Sharad Mohal News : लग्नाच्या वाढदिवसादिवशी पुण्यात कुख्यात गुंडाची हत्या, गोळीबारात गंभीर जखमी झालेल्या शरद मोहोळचा उपचारादरम्यान मृत्यू !
पुणे । 5 जानेवारी 2024 : Sharad Mohal News : कुख्यात गुंड शरद मोहोळ याची पुण्यात हत्या करण्यात आली आहे. शुक्रवारी दुपारी दीडच्या सुमारास अज्ञात हल्लेखोरांनी त्याच्यावर गोळीबार केला होता. या हल्ल्यात गंभीर जखमी झालेल्या शरद मोहोळचा उपचारादरम्यान मृत्यू झाला आहे, या वृत्तास पुणे शहर पोलिस दलातील वरिष्ठ अधिकाऱ्यांनी दुजोरा दिला आहे. पुण्यात भरदिवसा कुख्यात गुंडाची गोळ्या घालून हत्या करण्यात आल्याने मोठी खळबळ उडाली आहे.
पुण्यातील कोथरुड भागातील सुतारदरा येथे शुक्रवारी दुपारी मोटारसायकलवरून आलेल्या तीन ते चार अज्ञात हल्लेखोरांनी कुख्यात गुंड शरद मोहोळवर बेछूट गोळीबार केला होता. मोहोळ याच्यावर अगदी जवळून तीन ते चार गोळ्या झाडण्यात आल्या होत्या. त्यातील एक गोळी त्याच्या खांद्यावर लागल्याने तो गंभीर जखमी झाला होता. त्याला पुण्यातील खाजगी रुग्णालयात उपचारासाठी दाखल करण्यात आले होते. उपचारादरम्यान त्याचा मृत्यू झाला आहे. कुख्यात गुंडावर भरदिवसा गोळीबार झाल्याने पुणे शहरात मोठी खळबळ उडाली आहे. गोळीबाराचे कारण अद्याप स्पष्ट झाले नाही. ही घटना गँगवाॅरमधून घडली असावी असा संशय व्यक्त केला जात आहे.
आज शरद मोहोळ याच्या लग्नाचा वाढदिवस होता. लग्नाच्या वाढदिवशी कुख्यात गुंड शरद मोहोळ याची गोळ्या झाडून हत्या करण्यात आली. सुतारदरा भागातील घरासमोर त्याच्यावर गोळीबार करण्यात आला होता. या घटनेने पुणे शहरात मोठी खळबळ उडाली आहे.
पुण्यातील कोथरुड परिसर हा नेहमी गजबजलेला असतो. या ठिकाणी अज्ञात हल्लोखोरांनी शरद मोहोळ यांच्यावर तीन ते चार गोळ्या झाडल्या. त्यातील एक गोळी त्याच्या खांद्यावर लागली. त्यानंतर लागलीच शरद मोहोळ याला सह्याद्री हॉस्पिटलमध्ये दाखल करण्यात आले आहे. गोळीबार केल्यानंतर घटनास्थळावरुन आरोपी फरार झाले आहेत.
गोळीबाराच्या घटनेची माहिती मिळताच पोलिसांचे पथक घटनास्थळी दाखल झाले आहे. पोलिसांनी या प्रकरणी चौकशी सुरु केली आहे. तसेच परिसरातील सीसीटीव्ही फुटेज तपासून हल्लेखोरांची माहिती घेतली जात पुणे पोलिस या घटनेचा कसून तपास करत आहेत, अशी माहिती पोलिस उपायुक्त संभाजी कदम यांनी माध्यमांशी बोलताना दिली.
दरम्यान, कुख्यात गुंड शरद मोहोळ याचा मृतदेह ससून रुग्णालयात शवविच्छेदन करण्यासाठी आणण्यात आला आहे. ससून रुग्णालयाच्या परिसरात मोहोळ यांच्यावर समर्थकांनी मोठी गर्दी केली आहे. चारशे ते पाचशे जणांचा जमाव या ठिकाणी जमा झाला आहे.
कोण आहे शरद मोहळ ?
शरद मोहोळ पुण्यातील कुख्यात गुन्हेगार आहे. मोहोळवर हत्या, हत्येचा प्रयत्न, खंडणी, अपहरण यासारखे अनेक गुन्हे दाखल आहेत. पिंटू मारणे हत्येप्रकरणी त्याला अटक करण्यात आली होती. या खटल्यात तो जामिनावर बाहेर आला आणि दासवे गावचे सरपंच शंकर धिंडले यांचे त्याने अपहरण केल्या प्रकरणात त्याला पुन्हा अटक झाली. येरवडा कारागृहात शरद मोहोळने विवेक भालेराव याच्या साथीने दहशतवादी कृत्यांमध्ये सहभागाचा आरोप असलेल्या कतील सिद्दीकीचा खून केला. या प्रकरणात शरद मोहोळला जामीन मिळाला. मात्र बाहेर आल्यानंतर त्याची गुन्हेगारी कृत्य सुरुच होती. जुलै २०२२ मध्ये त्याला पुणे जिल्ह्यातून सहा महिन्यांसाठी तडिपार करण्यात आले होते.
